Қаржылық мониторинг агенттігінің Батыс Қазақстан облысы бойынша департаменті «Imrat Group» атты қаржы пирамидасын анықтап, оның заңсыз қызметін тоқтатты, деп хабарлайды Juzmedia.kz.
Канада, Гонконг және Ұлыбританияның атынан тіркелген «жалған халықаралық инвестициялық компания» ретінде көрінген ұйым азаматтарға тәулігіне 0,5–1,5 пайыз «жоғары табыс» уәде еткен. Қатысу үшін адамдар арнайы реферальды сілтеме арқылы тіркеліп, криптовалюта әмиянына 20-дан 10 000 АҚШ долларына дейін (USDT баламасында) қаражат аударуы тиіс болды. Алайда салымдар нақты инвестицияға емес, пирамида ішіндегі қатысушылар арасында қайта бөлініп отырған — бұрынғыларға төлем жаңадан келгендердің қаражаты есебінен жасалды.
Ұйымдастырушылар заңды инвестициялық жоба көрінісін беру үшін кеңсе жалдап, жарнама жасап, презентациялар мен конференциялар өткізген. Telegram-арна ашып, онда жоғары табыс пен қауіпсіздік жайлы бейнематериалдар жариялады.
Заңсыз қызмет дер кезінде тоқтатылды. Барлығы 30 азамат тартылып үлгерген, олардың салған қаржысы 89 миллион теңгеден асты. Қылмыстық іс сотқа жолданды. Қылмыстық-процестік кодекстің 201-бабына сәйкес өзге мәліметтер жарияланбайды.
Қаржылық мониторинг агенттігінің дерегінше, 2025 жылдың басынан бері 31 қаржы пирамидасына қатысты 90 сотқа дейінгі іс аяқталып, 7 миллиард теңге көлемінде залал өтелді. Сондай-ақ жалған инвестициялық жобаларды жарнамалаған 14 мыңнан астам интернет-ресурс бұғатталып, Instagram мен Telegram платформаларында 535 мыңға жуық қатысушысы бар 100-ден астам заңсыз чаттар жабылды.
