Батыс Қазақстан облысында аудан әкімдігі бөлімдерінің бірінің басшысы бұған дейін өзіне заңсыз тағайындаған 766 мың теңге көлеміндегі сыйақысын бюджетке қайтарды, деп хабарлайды Juzmedia.kz.
«Мой город» жазуынша, БҚО Әдеп жөніндегі кеңестің отырысы өтіп, онда Жәнібек аудандық сәулет, қала құрылысы және құрылыс бөлімінің басшысы Манарбек Әдиевтің тәртіптік ісі қаралған.
Белгілі болғандай, 2024 жылы шенеунік тәртіптік теріс қылық жасап, «атқаратын лауазымына толық сәйкес емес» деген жазаға тартылған. Мұндай жағдайда оның сыйақы алуға құқығы болмаған. Алайда прокурор Жандос Қуанышбековтың айтуынша, 2024 жылдың 9 желтоқсанында Манарбек Әдиев Тәуелсіздік күні мен Жаңа жыл мерекесіне орай өзіне заңсыз 766 мың теңге сыйақы тағайындап алған.
Заңбұзушылық фактісі қызметтік тексеріс барысында расталды. Әдиевтің өзі бұл әрекетін жоққа шығармай, онысын «ұмытшақтығымен» түсіндірген. Кейін ол барлық соманы бюджетке қайтарды.
Әдеп жөніндегі кеңес мүшелері шенеунікті қызметінен босатуды ұсынды. Соңғы шешімді Жәнібек ауданының әкімі қабылдайды.
«Juzmedia» - ақпараттық-ағартушылық портал. Қазақ қоғамының өсуі, өзгеруі тұсында болып жатқан құбылыстарды мүлт жібермейтін сенімді ақпарат көзі. Атауына қатысты түсініктеме бере кетсек: Елде болып жатқан әр іс-әрекеттің сыртында адам, адамның бет-бейнесі, ЖҮЗІ бар. Яғни, жауапкершілігі, ар-ожданы деген сөз. Мейлі қарапайым адам, мейлі шенеунік осы түсінік аясынан алшақтамаса.
Балбал тас
