Мәжіліске Салық кодексінің жобасына түзетулер пакеті енгізілді

Бүгін ҚР Ұлттық экономика министрлігі Мәжіліске салық кодексінің жобасына түзетулер пакетін енгізді, деп хабарлайды Juzmedia.kz.

ӨЗГЕРІСТЕР САЛЫҚТЫҚ ӘКІМШІЛЕНДІРУДІ ЖЕТІЛДІРУГЕ БАҒЫТТАЛҒАН

Негізгі түзетулер мыналарды қамтиды:

• Қосылған құн салығы бойынша міндетті тіркеу шегін төмендету –20 000 МРП (78,6 млн теңге) 3 800 МРП (15 млн теңге) дейін;
• Қосылған құн салығының мөлшерлемесін арттыру – 12%-дан 16%-ға дейін, бұған қоса бірқатар салалар үшін төмендетілген мөлшерлеме 10% белгіленеді;
• Жеңілдетілген декларация бойынша арнайы салық режимін қолдануды шектеу –   тек B2C сегментіне (бизнес түпкілікті тұтынушылар үшін) қолжетімді болады.

АУЫЛ ШАРУАШЫЛЫҒЫ ӨНДІРУШІЛЕРІ ҚҚС ТӨЛЕМЕЙДІ

Ұлттық экономика вице-министрі Арман Қасеновтың айтуынша, бөлшек саудада (дүкендер, мейрамханалар, киім-кешек және аяқ киім сатушылар) ештеңе өзгермейді – олардың жылдық табысы 2,4 миллиард теңгеден аспаса, тауар айналымының 4 пайызын төлеуді жалғастырады.

«Ауыл шаруашылығы өндірушілері ҚҚС төлемейді, бұл баға деңгейіне оң әсер етеді», - деді Ұлттық экономика вице-министрі Арман Қасенов Сенат отырысында.

Еске салайық, Қазақстан Үкіметі қосымша құн салығының қолданыстағы ставкасын көтеруді және осы салық бойынша тіркеу шегін төмендетуді ұсынған болатын. Алайда Президент Қасым-Жомарт Тоқаев Үкімет ұсынған ҚҚС мөлшерлемесі тым жоғары екенін айтып, министрлер кабинетіне мөлшерлеме мәселесін одан әрі пысықтауды тапсырды.