Индонезияның шығыс жағалауында магнитудасы 7,7 болатын күшті жер сілкінісі болып, қаза тапқандар саны 20 адамға жетті, деп хабарлайды Juzmedia.kz.
Жер сілкінісі сенбі күні таңертең Шығыс Нуса-Тенгара провинциясы маңында тіркелген. Жергілікті уақыт бойынша алғашқы жерасты дүмпуі сағат 04:58-де болған. Кейін бірнеше афтершок тіркелген, олардың ең күштісінің магнитудасы 6,2 болды.
Reuters мәліметінше, жер сілкінісі Шығыс Нуса-Тенгара, Батыс Нуса-Тенгара және Оңтүстік Сулавесидің кейбір аудандарында сезілген. Бірқатар елді мекенде биіктігі шамамен бір метр болатын цунами толқындары байқалған.
Жер сілкінісі салдарынан үйлер, мектептер, медициналық нысандар және басқа да ғимараттар зақымданған. Құтқарушылар зардап шеккен аудандарда іздестіру жұмыстарын жүргізіп, үйінділерді тазалап жатыр.
Бұған дейін бес адамның қаза тапқаны хабарланған еді. Алайда шалғай аудандардан жаңа мәліметтердің түсуіне және іздестіру жұмыстарының жалғасуына байланысты қаза тапқандар саны 20 адамға дейін өскен.
Қазір жергілікті билік зардап шеккендер туралы ақпарат жинап, апат салдарын жою үшін қосымша күштерді жұмылдырды.
Жер сілкінісінен кейінгі жағдайға байланысты нақты материалдық шығын мен жараланғандар саны әзірге жарияланған жоқ. Құтқару жұмыстары жалғасып жатыр.
