Қазақстанда жалақы қарызы үшін компания басшысына жаңа шаралар енгізіледі

2026 жылғы 25 тамыздан бастап жалақы бойынша берешекті өндіріп алу тәртібі өзгереді. Қызметкерлерге жалақы төлеу туралы сот шешімін орындамайтын компаниялардың басшыларына қатысты шаралар күшейтіледі, деп хабарлайды Juzmedia.kz агенттігі Finratings.kz-ке сілтеме жасап. 

Атқарушылық іс жүргізу аясында борышкер ұйымның басшысына Қазақстаннан шығуға уақытша шектеу қойылуы, ал қажет болған жағдайда іздеуге жариялануы мүмкін.

Басшыға қандай шара қолданылуы мүмкін?

Жеке сот орындаушысы берешекті өндіріп алу үшін қандай шаралар қабылданғанын көрсетуге міндетті. Жаңартылған есепте:

• атқарушылық іс жүргізудің басталғаны;
• борышкер мен өндіріп алушыға хабарлама жіберілгені;
• мүлік пен банктегі қаражаттың тексерілгені;
• борышкердің дебиторлық берешегінің бар-жоғы;
• тараптардың сот орындаушысына шақырылғаны;
• борышкердің әкімшілік немесе қылмыстық жауаптылыққа тартылғаны не одан бас тартылғаны;
• компания басшысының елден шығуына уақытша шектеу қойылғаны;
• лицензияларды, рұқсаттар мен арнайы құқықтарды тоқтату мәселесі бойынша сотқа жүгінілгені туралы мәліметтер көрсетіледі.

Сонымен қатар прокурор санкция берген жағдайда, жеке сот орындаушысы борышкер заңды тұлғаның басшысын немесе оның міндетін атқарушы тұлғаны іздеуге жариялау туралы қаулы шығара алады.

Қандай жағдайда іздеуге жариялануы мүмкін?

Бұл шара жалақы бойынша берешекті өндіріп алу туралы атқарушылық іс жүргізу басталған, бірақ компаниядан өндіріп алуға болатын ақша немесе мүлік табылмаған жағдайда қолданылуы мүмкін.

Басшыны іздеуге байланысты шығындар да атқарушылық іс жүргізу шығындарына енгізіледі.

Бұл ретте борышкердің табылып, жеке сот орындаушысымен байланысқа шығуы оның жалақы бойынша берешекті өтеу міндетін жоймайды.

Жаңа тәртіп қашан күшіне енеді?

Жаңа ережелер 2026 жылғы 25 тамыздан бастап қолданылады.

Маңыздысы, басшыға елден шығуға шектеу қою немесе оны іздеуге жариялау жалақыны кешіктіргені үшін автоматты түрде қолданылмайды.

Мұндай шаралар басталған атқарушылық іс жүргізу шеңберінде және заңда белгіленген тәртіппен қабылданады.