Қалта ұрлығынан қалай сақтануға болады - полиция кеңесі

Қалта ұрлығы бірнеше секундта жасалуы мүмкін. Әсіресе адам көп жиналатын қоғамдық орындарда ұқыпты болған жөн, деп хабарлайды Juzmedia.kz.

Полиция мәліметінше, қалта ұрылары көбіне қоғамдық көлік, аялдама, базар, сауда орындары мен адам көп жүретін көшелерді таңдайды. Мұндай жерлерде адамдардың назары көбіне телефонға, жол ақысына немесе бос орынға ауып кетеді. Қаскөй осы сәтті пайдаланып, адамның телефонын, әмиянын немесе басқа да заттарын білдіртпей алып кетуі мүмкін.

Мысалы, автобусқа міну кезінде жолаушылардың бір-біріне тығыз орналасуы, аялдамадағы қарбалас пен көліктің қозғалысы ұрлықты байқатпай жасауға мүмкіндік береді. Зардап шеккен адам заттарының жоғалғанын бірнеше минуттан кейін ғана білуі мүмкін.

Полиция қандай кеңес береді?

Жеке заттарды ұрлықтан қорғау үшін мамандар мына сақтық шараларын ұсынады:

• телефон мен әмиянды киімнің артқы немесе сыртқы қалталарына салмаңыз;
• қоғамдық көлікте сөмкені алдыңызда ұстаңыз;
• адам көп жерде рюкзакты арқаңызда емес, алдыңызға ұстаған дұрыс;
• сөмке мен жеке заттарыңызды қараусыз қалдырмаңыз;
• бағалы заттарды көзге түсетін жерде ұстамаңыз;
• айналаңыздағы адамдардың күмәнді әрекеттеріне назар аударыңыз;
• телефонмен сөйлескенде немесе әлеуметтік желілерді пайдаланғанда жеке заттарыңызды бақылауда ұстаңыз.

Қарапайым сақтық шараларын сақтау қалта ұрлығының алдын алуға және жеке заттарды қорғауға көмектеседі.