Шекарада жанармайды заңсыз шығарудың 500-ге жуық әрекеті тоқтатылды

Қазақстан шекарасында 10 күнде 1 млрд теңгеден астам заңсыз жүк тасымалының жолы кесілді, деп хабарлайды Juzmedia.kz.

Ұлттық қауіпсіздік комитетінің Шекара қызметі мемлекеттік шекара арқылы тауарлар мен жүктерді заңсыз өткізу әрекеттерінің жолын кесті.

ҰҚК мәліметінше, 1-10 тамыз аралығында 551 заңсыз тасымалдау фактісі анықталған. Заңсыз өткізілмек болған тауарлар мен жүктердің жалпы құны 1 млрд теңгеден асты.

Оның ішінде:

• 411 жағдайда жанар-жағармай материалдарын заңсыз алып шығуға әрекет жасалған;
• 140 фактіде халық тұтынатын тауарларды өткізу тәртібі бұзылған.

Заң талаптарын бұзған азаматтар қолданыстағы заңнамаға сәйкес жауапкершілікке тартылды.

ҰҚК Шекара қызметі өткізу пункттерінде құқыққа қайшы әрекеттерді анықтау және олардың жолын кесу бойынша жұмысты жалғастырып жатыр.