Отбасы банкте қызметкерлердің коррупциялық әрекеттеріне қатысты бірнеше факт анықталды. Бұл туралы банк 2025 жылғы есебінде хабарлады, деп хабарлайды Juzmedia.kz.
Банк мәліметінше, кейбір қызметкер клиенттердің, риелторлардың, жеке сот орындаушылары мен нотариустардың мүддесін заңсыз ілгерілеткені және тұрғын үй алу кезегін жылжытқаны үшін заңсыз сыйақы алған.
Сонымен қатар банктің филиалдарының бірінде қызметкер клиенттердің несие алуға қабілетті екенін растау үшін табысы туралы жалған құжаттар жасаған. Бұл құжаттар кейін несие рәсімдеуге арналған өтінімдерге тіркелген.
Аталған фактілер анықталғаннан кейін банкке қатысы бар қызметкерлермен еңбек шарттарын сенім жоғалуына байланысты бұзған.
Банк бұл деректер бойынша құқық қорғау органдарына арыз түсірген. Қазір бірнеше қылмыстық іс бойынша сотқа дейінгі тергеу жүргізіліп жатыр.
Отбасы банк жемқорлықтың алдын алу бағытындағы жұмыстарды күшейткенін атап өтті. Қызметкерлерге арнайы саясат пен ішкі ережелер түсіндіріліп, тұрақты түрде оқыту және білімін тексеру жүргізіледі.
2025 жылы сыбайлас жемқорлыққа қарсы оқудан банктің орталық аппараты мен филиалдарындағы 1 183 консультант, сондай-ақ тағы 1 506 қызметкер өткен.
Банк қызметкерлерге өздеріне белгілі болған кез келген жемқорлық фактісі туралы басшылыққа, қауіпсіздік қызметіне немесе сенім телефоны арқылы хабарлау міндетін де еске салды. Мұндай ақпаратты жасыру жеке жауапкершілікке әкелуі мүмкін.
Сонымен қатар 2025 жылы банк «Бірінші тұрғын үймен қамтамасыз ету орталығының» жұмысына сыбайлас жемқорлыққа қарсы мониторинг жүргізген. Тексеру барысында тұрғын үй кезегіндегі азаматтардың Бірыңғай республикалық электрондық базасын қалыптастыру және сүйемелдеу процестері, сондай-ақ «Тұрғын үймен қамтамасыз ету орталығы» базасының жұмысы талданған.
Талдау қорытындысы бойынша жемқорлыққа әкелуі мүмкін себептер мен жағдайларды жоюға арналған іс-шаралар жоспары әзірленген. Құжаттар Сыбайлас жемқорлыққа қарсы қызметке жолданған.
