Түркістан облысында зорлау дерегі бойынша күдікке ілінген Ерғали Аманбаев әзірге Бәйдібек аудандық мәслихатының депутаты мәртебесін сақтап отыр, деп хабарлайды Juzmedia.kz.
Бұл туралы аудандық мәслихат аппаратының Іnformburo.kz порталына берген жауабында айтылған.
Мәслихатта қылмыстық істің мән-жайына құқықтық баға беруге және сотқа дейінгі тергеп-тексеру жұмысына араласуға өкілеттігі жоқ екенін мәлімдеді.
«Егер құқық қорғау органдары немесе сот депутаттың мәртебесіне құқықтық салдары бар процестік шешім қабылдайтын болса, Бәйдібек аудандық мәслихаты бұл мәселені өз құзыреті шегінде және Қазақстан Республикасының заңнамасына сәйкес қарайды», – делінген аудандық мәслихат жауабында.
Еске салайық, бұған дейін Түркістан облысының полиция департаменті Шымкент қаласының тұрғыны зорлау дерегі бойынша күдікпен ұсталып, сот санкциясымен қамауға алынғанын хабарлаған болатын. Қазір сотқа дейінгі тергеп-тексеру жалғасып жатыр.
Сонымен қатар анонимді Telegram-арналарда күдіктінің Бәйдібек аудандық мәслихатының депутаты екені және жәбірленуші Қытай азаматы, Қазақстанда инвестициялық жобаны жүзеге асыру мүмкіндігін қарастыру үшін келген әлеуетті инвестор екені туралы ақпарат тарады.
Алайда бұл мәліметтерді құқық қорғау органдары ресми түрде растаған жоқ.
