Қазақстанда құрылыс көлемі қаншаға өсті

2026 жылдың қаңтар-маусым айларында Қазақстанда құрылыс жұмыстарының көлемі өткен жылдың сәйкес кезеңімен салыстырғанда 15,2%-ға өсіп, 4,1 трлн теңгеге жетті, деп хабарлайды Juzmedia.kz.

Ұлттық статистика бюросының мәліметінше, барлық құрылыс жұмыстарының 91,1%-ын жеке құрылыс компаниялары, 8,3%-ын шетелдік, ал 0,6%-ын мемлекеттік ұйымдар орындаған.

Өсімге негізінен ғимараттар мен инженерлік құрылыстарды салу және жөндеу жұмыстарының 22,5%-ға артуы әсер еткен.

Құрылыс жұмыстарының ең үлкен үлесі автомобиль және теміржол инфрақұрылымына тиесілі болды – 24,2%. Сонымен қатар тұрғын емес ғимараттар (21,5%) мен тұрғын үйлердің (13,2%) құрылысы да негізгі бағыттардың қатарында.

Қай өңірлерде құрылыс қарқынды жүріп жатыр?

Құрылыс көлемі республиканың 17 өңірінде өскен. Ең жоғары өсім мына аймақтарда тіркелді:

• Ұлытау облысы – 3,3 есе;
• Қызылорда облысы – 31,3%;
• Абай облысы – 31%;
• Павлодар облысы – 29,6%;
• Қостанай облысы – 26%;
• Түркістан облысы – 25,5%;
• Шығыс Қазақстан облысы – 22,3%;
• Алматы қаласы – 22,5%;
• Атырау облысы – 19,7%;
• Батыс Қазақстан облысы – 17,1%;
• Жамбыл облысы – 13,4%;
• Шымкент қаласы – 12,9%.

8,5 млн шаршы метрге жуық тұрғын үй пайдалануға берілді

Алты айдың қорытындысы бойынша елімізде 10,6 млн шаршы метрден астам жаңа нысан пайдалануға берілді. Оның ішінде тұрғын үйлердің жалпы ауданы 8,47 млн шаршы метрді құрап, өткен жылмен салыстырғанда 6,7%-ға артты.

Пайдалануға берілген тұрғын үйлердің:

• 5,75 млн шаршы метрі – көпқабатты тұрғын үйлер;
• 2,69 млн шаршы метрі – жеке тұрғын үйлер.

Жаңа баспаналардың 95,5%-ы жеке құрылыс салушылардың үлесіне тиесілі. Ал тұрғындардың өз қаражатына салынған үйлердің жалпы ауданы 2,85 млн шаршы метрді құрады.

Жаңа мектептер мен балабақшалар ашылды

Биылғы алғашқы жартыжылдықта әлеуметтік инфрақұрылым да кеңейді. Ел бойынша:

• 16 640 оқушыға арналған 30 мектеп;
• 3 297 орындық 30 балабақша;
• бір ауысымда 105 адам қабылдайтын 3 емхана;
• 120 орындық ауруханаға қосымша ғимарат пайдалануға берілді.

Сарапшылардың пікірінше, құрылыс саласындағы өсім тұрғын үй құрылысының, жол инфрақұрылымының және әлеуметтік нысандардың белсенді салынуымен байланысты.