Қаңтар оқиғасы бойынша сот үкімі шықты: «Дикий Арман» – 20 жыл, ҰҚК экс-қызметкері – 15 жыл

27.01.2025, 12:58

Істе 44 адам айыпталушы ретінде танылды. Олардың арасында қылмыс әлемінің серкесі - Арман Жұмагелдиев (Дикий Арман), Алматы мәслихатының бұрынғы депутаты әрі кәсіпкер – Қайрат Құдайберген, ҰҚК-нің бесінші басқармасының бұрынғы бастығы – Руслан Ысқақов, қаржы полициясының экс-агенті Талғат Махатов және журналист Бердах Бердімұрат бар.

Үкімдер:
Арман Жұмагелдиев (Дикий Арман): 20 жылға бас бостандығынан айырылды.
Руслан Ысқақов: 15 жыл 6 ай бас бостандығынан айырылды және мемлекеттік қызметте жұмыс істеуге өмір бойы тыйым салынды.
Қайрат Құдайберген: 8 жыл бас бостандығынан айырылды.
Бердах Бердімұрат: 7 жылға бас бостандығынан айырылды.
Қалған 40 айыпталушыға 1 жылдан 15 жылға дейінгі жаза тағайындалды.

СОТ ПРОЦЕСІНІҢ БАРЫСЫ

Сот отырыстары 2023 жылдың 6 қыркүйегінде басталып, үкімге дейін жабық режимде өтті. Бұған Руслан Ысқақовтың соттың алғашқы тыңдауларында 2022 жылғы Қаңтар оқиғалары кезінде бұйрықты ҰҚК-нің экс-төрағасының бірінші орынбасары Самат Әбіштен алғанын мәлімдеуі себеп болды.

2024 жылдың наурызында Самат Әбішке билікті асыра пайдаланды деген айып тағылып, оған шартты түрде 8 жыл бас бостандығынан айыру жазасы кесілген. Сарапшылар бұл үкімді сынға алып, оны заң үстемдігіне қайшы деп бағалады.

ҚАУІПСІЗДІК ШАРАЛАРЫ

Сот үкімі шығарылған күні тергеу изоляторының аумағы қатаң күзетке алынды. Аймақты полиция мен арнайы жасақ қоршап, қауіпсіздік шаралары күшейтілді. БАҚ өкілдері изолятор аумағына кіргізілмей, үкімді арнайы әкімшілік сот ғимаратында ұйымдастырылған трансляция арқылы бақылауға мәжбүр болды.

Бұл іс Қаңтар оқиғаларына қатысты ірі қылмыстық істердің бірі ретінде танылып отыр.