Петропавлдағы бетон зауытында болған жарылыста тәнінің 95 пайызы күйіп кеткен 51 жастағы жұмысшы ауруханада көз жұмды, деп хабарлайды Juzmedia.kz.
Ақ халаттылар бір тәуліктен аса уақыт бойы оның өмірі үшін арпалысқанымен, ажалға араша түсе алмады. Жұмысшының өндірісте алған жарақаты тым ауыр болып шықты.
Оқиға қалай болды?
Қайғылы жағдай 8 шілде күні жол құрылысына бетон дайындайтын кәсіпорын аумағында болған.
Алдын ала болжам бойынша, битум қыздыруға арналған техникалық май құйылған цистернадан өрт шығып, арты жойқын жарылысқа ұласқан. Сол сәтте құрылғыларды жоспарлы тексеруден өткізіп жүрген оператор лаулаған өрт пен лап еткен қызған майдың астында қалған.
Оқиға орнына дереу жеткен жедел жәрдем дәрігерлері зардап шегушінің денесін 2-3-дәрежелі термиялық күйік шалғанын анықтады.
Ол Петропавлдың көпбейінді қалалық ауруханасының жансақтау бөліміне шұғыл жеткізілгенімен, жағдайы аса ауыр болған.
Құтқару жұмыстары мен тергеу амалдары
Төтенше жағдайлар департаментінің 14 маманы жұмылдырылып, 20 шаршы метрге жайылған жалынды ауыздықтады.
Қазіргі уақытта бұл дерек бойынша Қылмыстық кодекстің 292-бабы, 1-бөлігі («Өрт қауіпсіздігі талаптарын бұзу»)мен қылмыстық іс қозғалды.
Тергеушілер өрт пен жарылыстың нақты себебін және кәсіпорындағы қауіпсіздік ережелерінің қаншалықты сақталғанын тексеріп жатыр.
