Қазақстан 2026-2027 жылдары жеті әлем чемпионатын өткізу құқығына ие болды. Бұл туралы Туризм және спорт министрлігі хабарлады, деп хабарлайды Juzmedia.kz.
Биыл қазан айында еліміз күрес түрлерінен әлем чемпионатын қабылдайды.
Ал 2027 жылы Астанада олимпиадалық спорт түрлері бойынша бокс, дзюдо, үстел теннисі, таеквондо, сондай-ақ киберспорт пен шорт-тректен жасөспірімдер арасындағы әлем чемпионаттары өтеді.
2027 жылғы жарыстардың кестесіне сәйкес, шорт-тректен жасөспірімдер арасындағы әлем чемпионаты 28–31 қаңтарда, бокстан – 10-26 сәуірде, үстел теннисінен – 22-30 мамырда, дзюдодан – 7-14 маусымда, ал таеквондодан – 7-13 шілдеде ұйымдастырылады. Киберспорттан әлем чемпионатының нақты мерзімі кейінірек белгілі болады.
Министрліктің мәліметінше, тәуелсіз Қазақстан тарихында алғаш рет ел екі жыл ішінде жеті әлем чемпионатын өткізу құқығын жеңіп алып отыр. Бұл Қазақстанның спорт инфрақұрылымы мен халықаралық деңгейдегі жарыстарды ұйымдастыру әлеуетінің жоғары екенін көрсетеді.
Сонымен қатар мұндай ірі додалар спорттың дамуына, туризм мен қызмет көрсету саласының жандануына және елдің халықаралық беделінің артуына ықпал етеді.
