Атырау тұрғыны Яна Легкодимованы өлтіргені үшін өмір бойына бас бостандығынан айырылған Ризуан Хайржанов пен Алтынбек Қатимов осы аптада №39 «Қара бүркіт» мекемесіне этаппен жеткізілді, деп хабарлайды Juzmedia.kz Ақжайыққа сілтеме жасап.
Бұған дейін сотталғандардың нақты қай жерде жазасын өтеп жатқаны қоғамда сұрақ тудырған болатын. «НеМолчиKZ» қоғамдық қоры Қазақстан Республикасы Ішкі істер министрлігінің Қылмыстық-атқару жүйесі комитетіне (ҚАЖК) ресми сауал жолдап, олардың №39 мекемеде емес, Қостанайдағы №76 мекемеде отырғаны туралы ақпаратты растауды немесе жоққа шығаруды сұраған.
Қоғамдық қордың мәліметінше, сотталғандар №76 мекемесінде ұсталған болуы мүмкін деген ақпарат тараған. Ал бұған дейін ҚАЖК жәбірленуші тарапқа олардың заңды күшіне енген сот үкіміне сәйкес жазасын өтеп жатқанын хабарлаған.
Жергілікті БАҚ-тың мәліметінше, осы аптада екі сотталған да өмір бойына бас бостандығынан айырылғандарға арналған №39 «Қара бүркіт» мекемесіне жеткізілген.
Еске салайық, Ризуан Хайржанов пен Алтынбек Қатимов Атырау тұрғыны Яна Легкодимованы өлтіргені үшін өмір бойына бас бостандығынан айырылған болатын. Бұл қылмыс қоғамда үлкен резонанс тудырып, көпшіліктің назарында болды.
Материал жарияланған сәтке дейін Қылмыстық-атқару жүйесі комитеті сотталғандардың қашан этаппен жеткізілгеніне қатысты ресми түсініктеме берген жоқ.
