Мәжіліс депутаты, төменгі палатадағы «Ақ жол» фракциясының жетекшісі Азат Перуашев партия төрағасы қызметінен кететінін мәлімдеді, деп хабарлайды Juzmedia.kz.
Бұл туралы ол партия съезінде айтты. Перуашев өз сөзінде 15 жыл бойы атқарған жетекшілік қызметін аяқтайтынын және партия басшылығын жаңарту қажет деп есептейтінін жеткізді.
Ол партия төрағалығына қазіргі орынбасары, Мәжіліс төрағасының орынбасары Дәния Еспаева кандидатурасын ұсынды.
Перуашевтің айтуынша, саяси ұйымдарда басшылықтың кезең-кезеңімен ауысуы жаңа идеялар мен серпіннің келуіне жол ашады.
«Монополия жаңа бастамаларға кедергі келтіруі мүмкін. Сондықтан мен өз еркіммен партия төрағасы өкілеттігін тоқтатуға шешім қабылдадым», – деді ол.
Азат Перуашев «Ақ жол» партиясын 2011 жылдың шілдесінен бері басқарып келді. 2012 жылдан бастап Мәжіліс депутаты ретінде партия атынан парламентке сайланған.
Дәния Еспаева 2016 жылдан бері Мәжіліс депутаты, ал 2023 жылдан бастап Мәжіліс төрағасының орынбасары қызметін атқарып келеді. Егер съезд оның кандидатурасын қолдаса, ол «Ақ жол» партиясын басқарған алғашқы әйел ретінде тарихқа енбек.
Айта кетейік, бұған дейін Перуашев 2025 жылдың қаңтарында президент Қасым-Жомарт Тоқаевтың сынынан кейін Қазақстанды «штрафстан» деп атаған сөзін қайтарып алған болатын. Сондай-ақ ол кейінгі кезеңде бұл пікіріне қатысты түсініктеме берген.
Саяси жаңалықтар аясында Астанада өткен съезде «Amanat» партиясы «Әділет» партиясымен бірігу үдерісін бастағаны да хабарланған еді.
