Оңтүстік Кореяның бұрынғы президенті Юн Сок Ёль әскери дрондарды Солтүстік Корея аумағына жіберу туралы бұйрық бергені үшін тағы 30 жылға бас бостандығынан айырылды. Мұндай шешімді ел астанасының соты шығарды, деп хабарлайды Juzmedia.kz.
Yonhap агенттігінің хабарлауынша, 65 жастағы экс-президент «жауға көмектесу» және «қызметтік өкілеттігін асыра пайдалану» баптары бойынша кінәлі деп танылған.
Дрондар Пхеньянға не үшін жіберілген?
Айыптау тарапының мәліметінше, Юн Сок Ёль 2024 жылдың қазан айында әскери ұшқышсыз ұшу аппараттарын Пхеньянның әуе кеңістігіне жіберуге бұйрық берген.
Прокуратура бұл әрекет елде әскери жағдай енгізуге сылтау жасау мақсатында жасалған деп есептейді. Алайда бұрынғы президент өзіне тағылған айыптарды жоққа шығарып отыр.
Әскери жағдай енгізу әрекеті қоғамды екіге бөлді
Юн Сок Ёль 2024 жылдың желтоқсанында Оңтүстік Кореяда әскери жағдай енгізуге әрекеттенген болатын. Алайда парламенттің қарсылығынан кейін бұл бастама жүзеге аспай қалды.
Оқиға салдарынан президент қызметінен шеттетіліп, ел ішінде үлкен саяси дағдарыс туындады.
Сарапшылардың пікірінше, бұл жағдай оңтүстіккореялық қоғамды екіге жарып, саяси ахуалды күрделендірді.
Экс-президентке қатысты сегіз қылмыстық іс қозғалған
Әскери жағдай енгізу әрекетіне байланысты Юн Сок Ёльге қарсы жалпы саны сегіз қылмыстық іс қозғалған.
Бұған дейін, 2026 жылдың ақпан айында Сеулдің Орталық аудандық соты оны билікті асыра пайдалану және бүлікке арандату баптары бойынша өмір бойына бас бостандығынан айырған еді. Сол кезде прокуратура экс-президентке өлім жазасын тағайындауды сұраған болатын.
Қазіргі уақытта Юн Сок Ёль аталған үкімге шағым түсірген.
