Жасанды интеллект технологияларының қарқынды дамуы алаяқтардың мүмкіндігін де арттырды. Бұрын жалған хаттар дайындау, фишингтік сайттар жасау немесе адамдарды алдау сценарийлерін ойластыруға бірнеше күн қажет болса, қазір мұның бәрін нейрожелілер бірнеше минутта орындай алады, деп хабарлайды Juzmedia.kz.
Fingramota жазуынша, киберқауіпсіздік мамандары жақында алаяқтардың ChatGPT сервисін пайдаланып, жалған хабарламалар таратқанын анықтады. Қаскүнемдер сервис жұмысында ақау бар деген жалған беттер жасап, пайдаланушыларға «ресми қосымшаны» жүктеуді ұсынған. Шын мәнінде, бұл зиянды бағдарлама болып шыққан.
Сарапшылардың айтуынша, дипфейк технологиялары да үлкен қауіпке айналып отыр. Қазір бірнеше аудио немесе бейнежазбаның көмегімен адамның даусын, бейнесін және сөйлеу мәнерін дәл көшіріп жасауға болады. Мұндай технологиялар алаяқтарға туыстың, достың немесе компания басшысының атынан хабарласып, ақша сұрауға мүмкіндік береді.
Жасанды интеллект еңбек нарығында да алаяқтық схемалардың көбеюіне себеп болды. Қылмыскерлер жалған бос жұмыс орындарын жариялап, жұмыс іздеушілерден жеке деректерін алуға немесе зиянды бағдарламаларды орнатуға әрекет етеді. Кей жағдайларда олар тіпті дипфейк көмегімен ойдан шығарылған үміткерлерді жасап, компанияларға жұмысқа орналасуға тырысады.
Мамандардың пікірінше, жасанды интеллект алаяқтық әрекеттерді арзандатып, жылдамдатты және кең ауқымда жүргізуге мүмкіндік берді. Сондықтан күмәнді сілтемелерге өтпеу, белгісіз бағдарламаларды орнатпау және ақша аудару туралы өтініштерді бірнеше рет тексеру бұрынғыдан да маңызды.
Сарапшылар цифрлық сауаттылық пен ақпаратты мұқият тексеру жасанды интеллект дәуіріндегі ең тиімді қорғаныс құралдарының бірі болып қала беретінін ескертеді.
