Атырауда кісі қолынан қаза тапқан Яна Легкодимованың анасы қызының өлімі үшін сотталғандардың жазасын нақты қай жерде өтеп жатқанын білмек болған. Алайда Қылмыстық-атқару жүйесі комитеті (ҚАЖК) бұл ақпаратты жариялаудан бас тартты, деп хабарлайды Juzmedia.kz.
Галина Легкодимованың ресми сауалына жауап берген ведомство сотталғандардың сот үкіміне сәйкес қылмыстық-атқару жүйесі мекемелерінде жазасын өтеп жатқанын ғана растаған. Бірақ нақты қай түзеу мекемесінде отырғанын айтудан бас тартқан.
ҚАЖК мұны Қылмыстық-атқару кодексі мен жеке деректерді қорғау туралы заң талаптарымен түсіндірді.
Ведомствоның мәліметінше, сотталған адамның жазасын өтеп жатқан орны туралы ақпарат оның өз қалауы бойынша жақын туыстарына немесе өзі көрсеткен адамдарға ғана беріледі. Ал жеке ісіндегі мәліметтер жария етілмейді.
Бұған дейін бұқаралық ақпарат құралдары мен әлеуметтік желілерде сотталғандардың өмір бойына бас бостандығынан айырылғандар жазасын өтейтін «Қара бүркіт» колониясына этаппен жіберілгені туралы ақпарат тараған болатын. Алайда бұл мәліметтер ресми түрде расталған жоқ.
«Ақ Жайық» басылымына берген сұхбатында Галина Легкодимова бұл сауалды қызығушылық үшін емес, сот үкімінің шынымен орындалып жатқанына көз жеткізу мақсатында жолдағанын айтты.
«Мен енді ғана аздап сабырға келе бастадым. Бұл сауалды олардың заң бойынша тиісті жерде отырғанына көз жеткізу үшін ғана жібердім. Жаңа өмір бастап, басқа қалаға көшіп, ары қарай өмір сүруге тырыстым. Бірақ бұл оқиға әлі күнге дейін бір сәт те есімнен шықпайды. Маған олардың өмір бойына бас бостандығынан айырылғанын және осындай ауыр қылмыс жасаған адамдарға арналған жағдайда жазасын өтеп жатқанын білу маңызды», – деді Яна Легкодимованың анасы.
Еске салайық, атыраулық студент Яна Легкодимованы өлтіргендер өмір бойына бас бостандығынан айыру жазасына кесілген болатын. Алайда олардың нақты қай түзеу мекемесінде жазасын өтеп жатқаны әзірге ресми түрде жарияланған жоқ.
