АҚШ-тың Вирджиния штатында жолаушылар автобусы мен бірнеше көліктің соқтығысуы салдарынан кемінде бес адам қаза тауып, тағы 44 адам жарақат алды, деп хабарлайды Juzmedia.kz.
ABC News хабарлауынша, қайғылы оқиға Вашингтон қаласынан шамамен 70 шақырым оңтүстікте орналасқан Стаффорд округіндегі I-95 тасжолында болған.
Алдын ала мәлімет бойынша, автобус жүргізушісі жол жөндеу жұмыстарына байланысты қойылған жылдамдықты төмендету туралы ескерту белгілерін елемеген. Соның салдарынан автобус алдымен жол талғамайтын көлікпен соқтығысып, кейін тағы бірнеше автокөлікті қағып кеткен.
Соққыдан кейін көліктердің бірі өртеніп кеткен.
Қаза тапқандар арасында Массачусетс штатынан шыққан төрт адамнан тұратын отбасы – 45 жастағы ер адам, 44 жастағы әйел және олардың 13 және 7 жастағы балалары бар. Сонымен қатар жол талғамайтын көлікте болған 25 жастағы әйел де көз жұмған.
Жараланғандар ауруханаларға жеткізілді. Олардың үшеуінің жағдайы ауыр деп бағалануда.
Автобус Нью-Йорктен Солтүстік Каролина штатындағы Шарлотт қаласына бағыт алған және ішінде шамамен 34 жолаушы болған. Жүргізушінің өзі де жарақат алған.
Оқиғаға қатысты тергеу басталды. Істі АҚШ-тың Ұлттық көлік қауіпсіздігі кеңесі де бақылауына алған.
