Бірыңғай жинақтаушы зейнетақы қорының (БЖЗҚ) есебінше, айына 1 млн теңге зейнетақы алу үшін шамамен 185 млн теңге жинақ қажет. Ал 250 мың теңге алу үшін – 46 млн теңге, 500 мың теңге үшін 92 млн теңгеден астам жинақ керек, деп хабарлайды Juzmedia.kz.
Қордың айтуынша, міндетті 10% жарна жоғары табысты зейнетақыны қамтамасыз етуге жеткіліксіз. 70% табысты алмастыру үшін шамамен 31% жарна 40 жыл бойы тұрақты аударылуы тиіс.
Зейнетақы төлемі жинақ көлеміне байланысты есептеледі: мысалы, 50 млн теңге жинақ болса – шамамен 270 мың теңге, 100 млн теңге болса – 540 мың теңгеден асады.
БЖЗҚ дерегінше, болашақ зейнетақы мөлшері ресми жалақыға, жарналардың тұрақтылығына және еңбек өтіліне тікелей байланысты.
Ерте бастамаған жағдайда жинақ айтарлықтай аз болады: 20 жыл қатысу – шамамен 96 мың теңге, 40 жыл – 311 мың теңге шамасында.
Қазір орташа зейнетақы жинағы небәрі 2,2 млн теңге, ал салымшылардың шамамен 27%-ы ең төменгі төлем алады. Негізгі қауіп факторлары – жарналардың үзіліп түсуі, «көлеңкелі» жалақы және жинақты мерзімінен бұрын пайдалану.
Қор мәліметінше, болашақта зейнетақының негізгі бөлігі жеке жинаққа тәуелді болмақ.
Дереккөз: NewTimes.kz
