Алматыда 5%-дық ипотекаға кімдер қол жеткізе алады

Алматыда жастарға арналған жеңілдетілген ипотекалық «Алматы Жастары» бағдарламасы бойынша өтінім қабылдау 1-15 маусым аралығында өтеді, деп хабарлайды Juzmedia.kz.

Өтінім қабылдау қашан басталады?

Өтінімдер 1 маусым күні сағат 09:00-ден бастап 15 маусым сағат 18:00-ге дейін қабылданады.

Құжаттарды kezekte.kz порталындағы «Тұрғын үй сервистері» бөлімінде орналасқан «Almaty Jastary» сервисі арқылы онлайн жолдауға болады.

Жүйеге кіру үшін электрондық цифрлық қолтаңба (ЭЦҚ) қажет.

Бағдарламаның шарттары қандай?

Бағдарлама аясында жастарға төмендегідей жеңілдетілген шарттар ұсынылады:

• несие көлемі – 20 миллион теңгеге дейін;
• пайыздық мөлшерлеме – жылдық 5%;
• бастапқы жарна – 10%;
• бастапқы және қайталама нарықтан пәтер сатып алуға мүмкіндік бар.

Бағдарламаға кімдер қатыса алады?

Жобаға Алматы қаласында тұратын 35 жасқа дейінгі азаматтар қатыса алады.

Негізгі талаптар:

• Алматыда кемінде бір жыл тұрақты тіркеуде болу;
• соңғы бес жыл ішінде үміткердің және оның отбасы мүшелерінің атында тұрғын үй болмауы;
• Алматы қаласында кемінде алты ай ресми жұмыс өтілі және міндетті зейнетақы аударымдарының болуы.

Бағдарлама денсаулық сақтау, білім беру, мәдениет, спорт салалары қызметкерлеріне, ЖОО мен ғылыми-зерттеу институттарының мамандарына, журналистерге, әлеуметтік сала өкілдеріне, құқық қорғау органдары мен коммуналдық қызмет қызметкерлеріне, сондай-ақ «Жұмыс істейтін жастар» бағдарламасының жалға алушыларына арналған.