Қазақстанда үш жаңа орден пайда болады

Қазақстанда тағы үш жаңа орден пайда болады.  Мәжіліс Қазақстанның мемлекеттік наградалары туралы заңға өзгерістер енгізу жөніндегі заң жобасын мақұлдады.

Құжатқа сәйкес, елімізде үш жаңа орден енгізіледі:

• «Мейірім» ордені – меценаттық және қайырымдылықпен айналысып, осы салаға елеулі үлес қосқан азаматтарға табысталады
• «Қожа Ахмет Ясауи» ордені - көрнекті қазақстандық және шетелдік ғалымдарға, сондай-ақ мемлекеттік және қоғам қайраткерлеріне беріледі
• «Әл-Фараби» ордені - білім, ғылым, мәдениет және рухани даму салаларында жоғары жетістіктерге жеткен азаматтарға арналған.

Заң жобасы енді Сенаттың қарауына жолданды.

Еске салайық, наурыз айында Президент Қасым-Жомарт Тоқаев «Қожа Ахмет Ясауи» орденін мемлекеттік наградалар қатарына енгізу туралы бастама көтерген болатын. Ал сәуірде Мемлекет басшысы «Әл-Фараби» орденін тағайындауды ұсынды. Бұл ордендер биыл алғаш рет Республика күні қарсаңында табысталады.