Қазақстанда халықты әлеуметтік қолдау – мемлекеттік саясаттың негізгі бағыттарының бірі. Бұл сала елдегі әлеуметтік тұрақтылықтың басты тірегіне айналып отыр, деп хабарлайды Juzmedia.kz.
Finprom.kz жазуынша, 2025 жылдың қорытындысы бойынша әлеуметтік көмек пен әлеуметтік қамтамасыз етуге мемлекеттік бюджет шығыстарының шамамен 20%-ы бағытталған. Бұл – білім беру саласынан кейінгі екінші ірі шығыс бабы.
Жалпы қаржыландыру көлемі тұрақты түрде өсіп келеді. Мәселен, 2025 жылы бұл бағытқа 6,7 трлн теңге бөлінді. Бұл – алдыңғы жылмен салыстырғанда 11%-ға көп. Соңғы бес жылда әлеуметтік шығындар 77,5%-ға артса, он жылда шамамен төрт есеге өскен.
Дегенмен бюджет құрылымында әлеуметтік саланың үлесі айтарлықтай өзгермеген – соңғы жылдары 20% шамасында сақталып отыр. Яғни қаржыландыру өссе де, басымдықтар қайта бөлінбеген.
Бюджеттік мүмкіндіктер шектеулі жағдайда әлеуметтік мәселелерді шешуге бизнес те белсенді араласа бастады. Ірі компаниялар корпоративтік әлеуметтік жауапкершілікті өз стратегиясының бір бөлігіне айналдырып отыр.
Жалпы алғанда, Қазақстанда әлеуметтік жауапкершіліктің жаңа үлгісі қалыптасып келеді. Бұл модельде мемлекет негізгі рөлді сақтай отырып, бизнес маңызды серіктеске айналуда.
Сарапшылардың пікірінше, алдағы уақытта мемлекеттік қолдау мен жеке сектор бастамаларының үйлесуі әлеуметтік саясаттың тиімділігін арттырып, елдегі өмір сапасына оң әсер етеді.
