Қазақстанда медициналық білім беру жүйесі қалай өзгереді

Қазақстанда дәрігерлерді даярлау жүйесі жаңарады, деп хабарлайды Juzmedia.kz.

Денсаулық сақтау министрі Ақмарал Әлназарованың мәлімдеуінше, 2026 жылдан бастап медициналық білім берудің жаңа моделі кезең-кезеңімен енгізіледі. Бұл өзгерістер ең алдымен жаңа талапкерлерге қатысты болады.

Жаңа ереже талаптары қандай?

Жаңа жүйе бойынша 2026 жылдан бастап медициналық жоғары оқу орындарына түсетін студенттер 6 жыл университетте оқып, кейін 1 жыл интернатурадан өтеді.

Оқуды аяқтаған соң түлектер:

• дәрігер ретінде бірден жұмыс істей алады (емханада да, стационарда да),
• немесе резидентураға түсіп, тар бейінді мамандықты игеруге мүмкіндік алады.

Сонымен қатар жаңа форматта «дәрігер-интерн» мәртебесі енгізіледі. Бұл – енді студент емес, белгілі бір тәжірибесі мен жауапкершілігі бар маман ретінде қалыптасқан кезең.

Айта кету керек, жаңа жүйе тек 2026 жылы оқуға түсетіндерге қатысты. Алғашқы түлектер 2033 жылы бітіріп шығады.

Қазіргі студенттер үшін не өзгереді?

Қазір білім алып жатқан студенттер бұрынғы жүйе бойынша оқуын жалғастырады:

• 2021 жылы түскендер – интернатурадан кейін емханаларда жұмыс істей алады немесе резидентураға түседі (бітіру жылы – 2027).
• 2022–2025 жылдары түскендер – 6 жыл оқиды, бірақ олардың оқу бағдарламасында практика көлемі мен оқу сағаттары арттырылған. Оқуды аяқтаған соң алғашқы медициналық-санитариялық көмек деңгейінде жұмыс істей алады немесе оқуын жалғастырады.

Яғни, қазіргі студенттердің оқу мерзімі мен мансаптық мүмкіндіктері өзгеріссіз қалады.