Бурятияда орналасқан кеніште болған қар көшкіні салдарынан Қазақстан азаматы қаза тапты, деп хабарлайды Juzmedia.kz агенттігі ТАСС-қа сілтеме жасап.
Ресей Төтенше жағдайлар министрлігінің мәліметінше, қайғылы оқиға Муй ауданы аумағында, «Ирокинда» кенішінде технологиялық жолды тазарту жұмыстары жүргізіліп жатқан кезде болған. Қар көшкіні жүрген сәтте учаскеде жалпы 9 адам жұмыс істеген.
Олардың үшеуі өздігінен қауіпсіз жерге шығып үлгерсе, қалған алты адам үйінді астында қалып қойған.
“Қаза тапқандардың бірі – Қазақстан Республикасының азаматы. Қалған бесеуі Ресей Федерациясының азаматы болған”, – делінген хабарламада.
Кейін қаза тапқандардың бәрінің денесі табылып, іздестіру-құтқару жұмыстары толық аяқталды.
Оқиғаға байланысты қылмыстық іс қозғалды.
