Ақтау әкімдігі қаланы безендіруге 30 млн теңге жұмсамақ

Ақтауда мамыр мерекелеріне дайындыққа 30 млн теңге бөлінбек, деп хабарлайды Juzmedia.kz.

Lada.kz жазуынша, қалалық тұрғын үй-коммуналдық шаруашылығы бөлімі облыс орталығын алдағы мерекелерге безендіретін мердігерді анықтау үшін конкурс жариялаған.

Бөлінген қаржы 1 мамыр — Қазақстан халқының бірлігі күні, 7 мамыр — Отан қорғаушылар күні және 9 мамыр — Жеңіс күніне арналған безендіру жұмыстарын қамтиды.

Техникалық сипаттама бойынша мердігер келесі міндеттерді орындауы тиіс:

• Баннерлер мен билбордтар: 180 баннер және 16 брендмауэр орнату;
• Тулар мен композициялар: 5 000-нан астам тақырыптық ту ілініп, 104 ту тұғыры жөнделеді;
• Мерекелік перетяжкалар мен LED-экрандарға арналған арнайы бейнероликтер әзірлеу;
• Барлық конструкция қаланың орталық көшелеріне қойылып, мерекеден соң демонтаждалады.

Ақтаулықтарды алаңдатып отырған басты мәселе уақыттың тым аздығы. Конкурс 23 сәуірде жарияланған, ал оның жеңімпазы тек 27 сәуірде ғана белгілі болады.

Егер конкурс нәтижесі мерекеге 3-ақ күн қалғанда анықталса, компания қаланы 1 мамырға дейін толық безендіріп үлгере ме? Әзірге бұл сұрақ ашық қалып отыр.