23 сәуір – Ұлттық кітап күніне орай еліміздегі кітапханалар жүйесі мен оқырман белсенділігі туралы негізгі статистика жарияланды, деп хабарлайды Juzmedia.kz
Елімізде қанша кітапхана бар?
2025 жылдың қорытындысы бойынша Қазақстанда 3 912 көпшілік кітапхана жұмыс істейді. Оларда 10 мыңнан астам қызметкер еңбек етеді.
Кітапханалардың басым бөлігі ауылдық жерлерде орналасқан – 3 343.
“Жалпы кітап қоры 110,3 млн басылымды құрайды, оның ішінде 69,6 млн-ы – кітап”, – дейді Ұлттық статистика бюросының өкілдері.
Ең ірі қор Алматы қаласында шоғырланған. Яғни мегаполис кітапханаларында 37,5 млн басылым бар.
Қай өңірде кітапханаға келушілер саны көп?
Ең көп кітапхана Түркістан облысында – 388 мекеме. Одан кейін Батыс Қазақстан (359), Ақмола (341) және Қостанай (336) облыстары тұр.
Еліміз бойынша кітапханалардың басым бөлігі әмбебап форматта жұмыс істейді – 3 866 кітапхана.
2025 жылы кітапханаларға келушілер саны 55,2 млн ретке жетті. Ең жоғары көрсеткіш – Алматы қаласында, яғни қалада 5,4 млн келуші тіркелген.
Сондай-ақ Солтүстік Қазақстан (4,6 млн) және Түркістан (4,1 млн) облыстары да алдыңғы қатарда тұр.
