Біріккен Араб Әмірліктерінде ұсталған қазақстандық азаматқа Дубай соты өмір бойы бас бостандығынан айыру жазасын тағайындады, деп хабарлайды Juzmedia.kz.
ҚР Сыртқы істер министрлігінің мәліметінше, 18 наурызда бірінші сатыдағы сот Ернұр Алмаханды бірқатар ауыр қылмыс бойынша кінәлі деп танып, оған қоса айыппұл салған.
Алайда сотталушы апелляциялық шағым түсірген, сондықтан үкім әлі заңды күшіне енген жоқ.
Қазақстанның Дубайдағы бас консулдығы азаматқа консулдық-құқықтық көмек көрсетуді жалғастырып жатыр.
Туыстары кінәсіз деп санайды
Сотталған азаматтың туыстары оның 2024 жылы қыркүйекте жұмыс істеу үшін БАӘ-ге барғанын айтады. Ол жүргізуші болып жұмыс істеген.
Анасы ұлының кінәсіз екеніне сеніп, оны жала жабудың құрбаны болуы мүмкін деп есептейді.
Отбасының айтуынша, олар ұзақ уақыт бойы тағылған айыптардың мән-жайын толық білмеген. Үкім туралы тек 2026 жылдың сәуірінде хабардар болған.
Апелляция 27 сәуірге жоспарланған.
Бұқаралық ақпарат құралдарында бұл іс 2025 жылғы Жаңа жыл түні Дубайда Finiko қаржы пирамидасының негізін қалаушылардың бірі Эдвард Сабировқа жасалған шабуылға байланысты болуы мүмкін екені айтылады.
