Қазақстан шетелдік инвесторлар, кәсіпкерлер және білікті мамандар үшін елге кіру, жұмысқа орналасу және тұрақты тұру рәсімдерін жеңілдетіп, көші-қон саясатын жаңартып жатыр, деп хабарлайды Juzmedia.kz.
Сондай-ақ жаңа тәсілдер визалық рәсімдерді оңтайландырып, сұранысқа ие кадрларды тартуға бағытталған. Бұл шаралар экономиканың түрлі салаларында білікті мамандар тапшылығын азайтуға мүмкіндік береді.
Сұранысқа ие мамандарға жеңілдетілген шарттар
Жаңартылған тәртіпке сәйкес, шетелдік азаматтар үшін арнайы визалық режимдер мен өтінімдерді жедел қарау мүмкіндігі қарастырылған. Әсіресе ІТ саласы, денсаулық сақтау, креативті индустрия, инженерлік және жаратылыстану бағыттарындағы мамандарға сұраныс жоғары.
Жасанды интеллект инженері, ақпараттық қауіпсіздік маманы, нейрохирург, онколог, графикалық дизайнер секілді кәсіп иелеріне басымдық берілуде.
2026 жылдың басынан бері сұранысқа ие мамандықтар бойынша шетелдік жұмыс күшін тартуға 5,1 мың рұқсат берілген. Ал еңбек иммигранттарына шамамен 75 мың рұқсат рәсімделген.
Биыл шетелдік жұмыс күшін тарту квотасы 23,6 мың адамды құрайды, ал еңбек иммигранттары үшін белгіленген квота 221,8 мың деңгейінде.
Тұрақты тұруға рұқсат беру тәртібі жаңарды
Қазақстан тұрақты тұруға ниетті шетел азаматтарын қабылдау тетігін де жаңартуда. Жаңа жүйе үміткерлерді кезең-кезеңімен бағалауды көздейді. Олардың мемлекеттік тілді базалық деңгейде меңгеруі, сауалнамалық деректер, цифрлық скоринг нәтижелері, мемлекеттік органдар тексерісі және қорытынды сұхбат ескеріледі.
Еңбек және халықты әлеуметтік қорғау министрлігінің хабарлауынша, бұл тәсіл елде ұзақ мерзімге тұрақтап, қоғам өміріне белсенді араласуға дайын азаматтарды таңдауға бағытталған. Мамандардың пікірінше, мұндай өзгерістер көші-қон үдерістерін тиімді басқаруға, әлеуметтік тұрақтылықты нығайтуға және экономиканың дамуына оң әсер етеді.
