Қазақстанда тұрғын үй жағдайын жақсарту үшін біржолғы зейнетақы төлемдерін пайдалану қағидаларына өзгерістер енгізілді. Жаңа талаптар 2026 жылғы 17 сәуірден бастап күшіне енеді, деп хабарлайды Juzmedia.kz.
Зейнетақы есебінен тек негізгі қарыз өтеледі
Жаңартылған ережеге сәйкес, енді азаматтар зейнетақы жинақтарының артық бөлігін пайдаланып, екінші деңгейлі банктердегі ипотекалық қарызын мерзімінен бұрын өтеген кезде тек негізгі қарызды ғана жаба алады.
Ал несие бойынша есептелетін сыйақы, пайыздар және өзге де төлемдер қарыз алушының өз қаражаты есебінен төленуі тиіс.
Бұл өзгеріс зейнетақы қаражатын пайдаланудың мақсатты әрі тиімді болуын қамтамасыз етуге бағытталған.
Қарызды растау үшін не қажет?
Сонымен қатар, енді зейнетақы қаражатын ипотеканы өтеуге пайдалану үшін арнайы талап енгізілді. Азаматтар enpf-otbasy.kz платформасына несие бойынша берешек бар екенін растайтын жаңа үлгідегі анықтаманы жүктеуі керек.
Бұл құжатта міндетті түрде негізгі қарыздың нақты қалдығы көрсетілуі тиіс. Осыған байланысты Отбасы банк екінші деңгейлі банктерге тиісті хат жолдап, клиенттерге жаңа форматтағы анықтамаларды беру қажеттігін хабарлады.
Жаңа талаптар зейнетақы жинақтарын пайдалану рәсімін нақтылап, қаржы операцияларының ашықтығын арттыруға бағытталған.
