Нигерияның солтүстік-шығысындағы Йобе штатында орналасқан базарға әскери әуе соққысы жасалып, кемінде 200 адам қаза тапты, деп хабарлайды Juzmedia.kz.
Reuters агенттігінің хабарлауынша, соққы Йобе және Борно штаттарының шекарасында орналасқан Джилли ауылындағы базарға бағытталған. Бұл аумақта әскер «Боко Харам» (Boko Haram) террористік тобының содырларын қудалап жүрген болатын.
Аудан басшысының кеңесшісі әрі Гужба округінің жетекшісі Лаван Занна Нура Гейдамның айтуынша, қаза тапқандар саны 200-ден асып кеткен. Ол жараланғандардың Йобе және Борно штаттарындағы ауруханаларға жеткізіліп жатқанын мәлімдеді.
Әуе соққысы мен құрбандар саны туралы ақпаратты жергілікті үш тұрғын және халықаралық гуманитарлық ұйым өкілі де растады.
Нигерия Әскери-әуе күштері Джилли ауданында «Боко Харам» содырларының көзі жойылғанын хабарлады.
Йобе штатының Төтенше жағдайлар агенттігі (SEMA) Джилли базарындағы оқиға туралы алдын ала мәлімет алғанын және саудагерлер арасында құрбандар бар екенін жеткізді. Қазіргі уақытта шұғыл әрекет ету шаралары басталды.
Зардап шеккендердің бірі, 43 жастағы медициналық тауарлар сатушысы Ахмед Али жарылыс кезінде жарақат алғанын айтты. Оның айтуынша, соққы жасалған сәтте ол қашуға тырысқан, артынша өзге адамдармен бірге жерге жата қалып аман қалған.
