Әлемдік мұнай нарығында баррель үшін жаппай «жарыс» күшейіп, мұнай тапшылығы айқын сезіле бастады. Инвесторлар Иранмен байланысты жағдайға назар аударғанымен, трейдерлер мен мұнай өңдеу зауыттары жедел жеткізілетін шикізатты кез келген жерден сатып алуға тырысуда, деп хабарлайды Juzmedia.kz.
Bloomberg басылымының жазуынша, Солтүстік теңіздегі ең ірі физикалық мұнай нарығында трейдерлер осы аптада 40 өтінім бергенімен, соның тек төртеуі ғана қанағаттандырылған. Жақын апталарда жеткізілетін мұнай баррелі 140 доллардан да жоғары бағаға сатылған.
Сарапшылардың айтуынша, бұл жағдай шикі мұнайдың нақты тапшылығын көрсетеді. Жеткізілімнің азаюы алдағы апталарда әлемдік нарықтағы қысымды күшейтуі мүмкін. Кейбір сарапшылар Еуропа мұнай өңдеу зауыттары өндірісті қысқартуға мәжбүр болуы мүмкін екенін айтады.
Нарықтағы дүрбелең фьючерстік бағамен керісінше бағытта дамуда: маусым айындағы мұнай фьючерстері 13%-ға төмендеп, шамамен 95 доллар деңгейінде жабылған.
Мұнай нарығындағы бағаның күрт өсуі жеткізілімге ең жақын шикізат үшін үстеме бағаның (премия) айтарлықтай артқанын көрсетеді. Кейбір азиялық өңдеушілер бағаға емес, мұнайды кез келген жолмен тез жеткізуге басымдық беріп отыр.
Сарапшылардың пікірінше, мұндай жағдай дизель мен авиациялық отын сияқты өнімдердің тапшылығын күшейтуі мүмкін. Әсіресе Азия елдері жаңа жеткізу көздерін АҚШ, Канада және Венесуэладан іздеуге көшкен.
Кейбір нарықта мұнай бағасы 2008 жылғы рекордтардан да асып кеткен. Ал физикалық нарық пен фьючерс арасындағы айырмашылық тарихи деңгейге жетіп отыр.
Сарапшылар бұл үрдіс жалғаса берсе, мұнай нарығында ұзақ мерзімді теңгерімсіздік пен жеткізу дағдарысы күшеюі мүмкін екенін ескертеді.
