Исламабадта өткен келіссөздер барысында америкалық тарап Иран делегациясымен түпкілікті келісімге қол жеткізе алмады. Бұл туралы АҚШ вице-президенті Джей Ди Вэнс Пәкістан астанасындағы келіссөздер қорытындысы бойынша өткен баспасөз мәслихатында мәлімдеді, деп хабарлайды Juzmedia.kz.
«Біз ирандық тараппен бірқатар мазмұнды пікір алмасулар өткіздік. Бұл – жақсы жаңалық. Алайда жаман жаңалық – біз келісімге келе алмадық... Бізге олардың ядролық қару жасауға ұмтылмайтыны және оны тез арада әзірлеуге мүмкіндік беретін құралдарды қолға алуға талпынбайтыны жөнінде нақты кепілдік қажет. Негізгі мәселе мынада: біз олардың тек бүгін немесе екі жылдан кейін емес, ұзақ мерзімде де ядролық қару әзірлемеуге дайын екенін көріп отырмыз ба? Әзірге ондай дайындықты байқамадық, бірақ оны көруге әлі де үміттіміз», – деді ол.
Вэнстің айтуынша, америкалық тарап Иранға «соңғы рет бейбіт ұсыныстарын» жеткізген.
«Біз өте қарапайым ұсыныс қалдырып барамыз. Бұл – өзара түсіністікке келудің тәсілі және ол біздің түпкілікті әрі [Тегеран үшін] ең тиімді ұсынысымыз», – деді ол.
Сонымен қатар АҚШ вице-президенті Иранның Америка Құрама Штаттары ұсынған шарттарды қабылдаудан бас тартқанын атап өтті.
«Біз өзіміздің “қызыл сызықтарымызды” нақты айқындап бердік: қай мәселеде ымыраға келуге дайынбыз, қай жерде келісе алмаймыз, барлығын барынша ашық жеткіздік. Алайда олар біздің шарттарымызды қабылдамауды дұрыс көрді», – деді Вэнс.
Еске салайық, 11–12 сәуір күндері Исламабадта Пәкістанның делдалдығымен Иран мен АҚШ арасында келіссөздер өтті.
Келіссөздерге Вашингтон тарапынан АҚШ вице-президенті Джей Ди Вэнс бастаған делегация қатысты. Оның құрамында сондай-ақ президенттің арнайы өкілі Стив Уиткофф пен кәсіпкер Джаред Кушнер болды.
Иран жағынан келіссөздерге парламент спикері Мохаммад-Багер Галибаф пен сыртқы істер министрі Аббас Арагчи қатысты.
Кездесуге сондай-ақ Пәкістан құрлық әскерлері штабының бастығы Асим Мунир де қатысқан.
