Атырау мұнай өңдеу зауытына 540 млн теңге айыппұл салынды

Атырау мұнай өңдеу зауыты (АМӨЗ) ауаға зиянды қалдықтарды шамадан тыс шығарғаны үшін ірі көлемде айыппұл арқалады. Бұл туралы Орталық коммуникациялар қызметінде өткен брифингте Экологиялық реттеу және бақылау комитеті төрағасының орынбасары Әлібек Бекмұхаметов айтты деп хабарлайды Juzmedia.kz.

Экология департаменті жоспардан тыс тексеруді қала тұрғындарының шағымынан кейін бастаған. Атыраулықтар ауадағы күкіртсутегі иісіне жаппай шағымданған болатын. Тексеру нәтижесінде кәсіпорынның күкірт диоксиді, көміртегі оксиді және азот мөлшерін нормадан асырып жібергені анықталды.

Анықталған заң бұзушылықтар бойынша үш протокол толтырылып, сот зауытқа 520 млн теңге айыппұл салды. Кәсіпорын бұл шешіммен келіспей, апелляцияға шағым түсіргенімен, нәтиже болмады.

«Зауыт шешімді қайта қаратуға тырысты, бірақ одан ештеңе шықпады. Бұған қоса тағы 20 млн теңге көлемінде қосымша айыппұл салынды. Осылайша, өндіріп алынатын жалпы сома 540 млн теңге болды», — деді Әлібек Бекмұхаметов.

Қазіргі таңда экологиялық талаптардың сақталуы мемлекеттік органның қатаң бақылауында.