Лос-Анджелестегі алқабилер соты Meta және YouTube компанияларын бала кезінен әлеуметтік желіге тәуелді қылды деп айыптаған бойжеткеннің пайдасына шешім шығарды деп хабарлайды Juzmedia.kz.
Алқабилер Instagram, Facebook және WhatsApp иесі Meta, сондай-ақ YouTube-ке иелік ететін Google компаниялары тәуелділік тудыратын өнімдерді әдейі жасап шығарды деген қорытындыға келді. Бұл 20 жастағы талап арыз иесінің психикалық саулығына кері әсерін тигізген.
Кейли есімді бойжеткенге 3 миллион доллар көлемінде өтемақы тағайындалды. Соттың бұл шешімі қазіргі уақытта АҚШ соттарында қаралып жатқан жүздеген ұқсас істердің нәтижесіне әсер етуі мүмкін.
Meta компаниясының заңгерлері Кейлидің өмірінде көптеген қиындықтарды бастан өткергенін мойындағанымен, оның Instagram-ды пайдалануы бұл мәселелердің себебі немесе оны ушықтырған басты фактор емес екенін алға тартты.
«Біз сот шешімімен келіспейміз және қазіргі уақытта алдағы құқықтық қадамдарды қарастырып жатырмыз», — деді Meta өкілдері.
«Біз үкіммен келіспейміз және апелляцияға шағым түсіруге ниеттіміз. Бұл істе YouTube-тің мәні бұрмаланған. YouTube — әлеуметтік желі емес, бейне контентті таратуға арналған адал әзірленген платформа», — делінген Google мәлімдемесінде.
Алқабилер шешімі бойынша, талап арыз иесіне келтірілген шығын үшін Meta компаниясы 70%, ал YouTube 30% жауапты деп танылды. Бұл Meta компаниясы Кейлиге өтемақының басым бөлігін төлейтінін білдіреді.
Айыппұл түріндегі қосымша өтемақы мөлшерін сот кейінірек анықтайды. Калифорния штатының заңдары бойынша бұл сома 30 миллион долларға дейін жетуі мүмкін.
