Көлік салығы қалай өзгереді

Қазақстанда 2026 жылдан бастап көлік салығын есептеудің жаңа ережелері енгізілді. Негізгі жаңалық — ескі автокөлік иелері үшін арнайы төмендету коэффициенттері қарастырылған. Алайда, көптеген жүргізушілер бұл жеңілдікті қазірден бастап күтіп отыр. Мемлекеттік кірістер комитеті (МКК) жағдайға қатысты түсініктеме берді, деп хабарлайды Juzmedia.kz.

Жаңа Салық кодексіне сәйкес, жеңіл автокөліктердің шыққан жылына байланысты салық мөлшері азаяды:

• 10 жылдан 20 жылға дейінгі көліктерге — 0,7 коэффициенті (30% жеңілдік);
• 20 жылдан асқан көліктерге — 0,5 коэффициенті (50% жеңілдік) қолданылады.

Салықты есептеу механизмі бұрынғыдай қалды, яғни төлем мөлшері қозғалтқыш көлеміне (куб.см) байланысты және жыл сайын 1 сәуірге дейін төленуге тиіс.

Жеңілдіктер қашан іске қосылады?

Маңызды мәселе: жаңа ережелер қазіргі төлемдерге әсер етпейді. Себебі, салық әрқашан өткен жыл үшін төленеді.

1. 2026 жылы қазақстандықтар салықты 2025 жыл үшін төлейді. Бұл кезде ескі ережелер сақталады және 1 АЕК — 3 692 теңге болып есептеледі.
2. Төмендету коэффициенттері тек 2026 жылғы салық міндеттемелеріне қолданылады. Демек, жүргізушілер жеңілдікті нақты 2027 жылы (2026 жыл үшін төлегенде) ғана сезінеді. 2026 жылғы есептеулер үшін АЕК мөлшері 4 325 теңге деп бекітілген.

Соңғы күндері қолданушылар МКК сайтындағы салық калькуляторында көліктің шыққан жылын таңдау мүмкіндігі жоқ екеніне және сервистің қате беретініне шағымданған болатын. Ведомство бұл жағдайды «техникалық ақау» деп түсіндіріп, жақын арада сервистің қайта іске қосылатынын мәлімдеді.

Кімдер салықтан босатылған?

Жаңа кодексте де белгілі бір санаттағы азаматтарға жеңілдіктер сақталған:

• Ардагерлер мен мүмкіндігі шектеулі жандар;
• «Халық қаһарманы», «Қазақстанның Еңбек Ері» атағы барлар;
• «Отан» орденінің иегерлері;
• Көпбалалы аналар («Батыр ана», «Алтын алқа», «Күміс алқа» иегерлері).