Мемлекет басшысы Қасым-Жомарт Тоқаев әл-Фараби атындағы ҚазҰУ-да ғылыми қоғамдастықпен кездесіп, саладағы қордаланған мәселелерді ашық атап өтті. Президенттің айтуынша, мемлекет тарапынан қомақты қолдау көрсетілгеніне қарамастан, ғылымның экономикаға тигізер пайдасы әлі де төмен, деп хабарлайды Juzmedia.kz.
Кездесуде айтылған негізгі мәселелер мыналар:
Тиімсіз шығындар: Жыл сайын ғылымға 200 миллиард теңгеден астам қаражат бөлінеді. Алайда Бас прокуратураның тексерісі Ғылым қоры мен министрлікте ауқымды қаржылық заңбұзушылықтарды әшкерелеген. Қазіргі таңда 11 қылмыстық іс қозғалды.
Коммерцияландырудың төмендігі: 3 мыңнан астам ғылыми жобаның тек 29-ы ғана нарыққа шыққан. Президент Ғылым қорының қызметін қайта қарап, инновацияларды нақты іске асыруды тапсырды.
Мамандар теңгерімсіздігі: Елде гуманитарлық сала мамандары (заңгер, филолог, дипломат) тым көп. Тоқаев ұлттық менталитетті өзгертіп, назарды технология мен жаратылыстану ғылымдарына бұру қажеттігін қадап айтты.
Гранттарды қайта қарау: Үкіметке шетелдік жоғары оқу орындарына бөлінетін мемлекеттік гранттардың құнын қайта пысықтау жүктелді.
Президент отандық ғылымның әлеуеті жоғары екенін, бірақ ол үшін «толайым табысқа жеттік» деген мақтаннан арылып, нақты нәтижеге жұмыс істеу керектігін ескертті.
