Индонезиядағы танымал курорт Бали аралында нөсер жауын мен су тасқыны жалғасып жатыр, деп хабарлайды Juzmedia.kz.
The Bali Sun мәліметінше, қауіпті ауа райы туралы ескерту Бадунг округі, Денпасар қаласы және Гианьяр округінде жарияланған. Бұл негізгі туристік аймақтарға да қауіп бар екенін көрсетеді.
Су басқан аумақтардан тұрғындар мен туристер эвакуацияланып жатыр. Құтқару қызметтері адамдарды үйлер мен қонақүйлерден шығарып, қауіпсіз жерге көшіруде. Туристерге жергілікті билік пен жедел қызметтердің талаптарын қатаң сақтау ескертілді.
Бали полициясының бөлімшелері бірнеше күн бойы су тасқыны салдарын жою жұмыстарын жүргізіп келеді. Құтқарушылар тұрғындарды сабыр сақтап, қызметкерлердің нұсқауын орындауға шақырды.
