Талғар қаласына жаңа әкім сайланып жатыр

Талғар қаласына жаңа әкімі сайланады. Бұл орынға үш үміткер: Арыстанбек Әбілқайырұлы, Жәнібек Кәденов және Әлібек Рамазанов таласып жатыр, деп хабарлайды Juzmedia.kz.

Талғар аудандық аумақтық сайлау комиссиясының төрағасы Дәулет Батталғазиевтің айтуынша, сайлау 26 сайлау учаскесінде сағат 7.00-ден 20.00-ге дейін өтеді.

Талғар қаласында барлығы 42 774 сайлаушы тіркелген. Бастапқыда 9 адам ұсынылған болатын, оның жетеуі өзін-өзі ұсынса, біреуі «AMANAT» партиясынан, тағы бірі ҚХП атынан ұсынылды. Бұл ретте екі үміткер тіркеуден өткен жоқ, ал тағы төрт үміткер өз еркімен кандидатурасын алып тастады.

Нәтижесінде тұрғындар үш үміткердің бірін таңдауы керек:

• Арыстанбек Әбілқайырұлы, 41 жаста, «AMANAT» партиясының үміткері. «Талғар Тұрғын үй» ЖШС басшысы, Талғар қаласы.
• Кәденов Жәнібек Жанбулатұлы, 33 жаста, ҚХП үміткері. Талғар қаласы, «Талғар ауданы әкімінің аппараты» ММ қаржы-шаруашылық бөлімінің бас маманы.
• Рамазанов Әлібек Ғайсаұлы, 42 жаста, өзін-өзі ұсынған кандидат. «Бесағаш ауылдық округі әкімінің аппараты» ММ, Талғар ауданы әкімінің орынбасары.

Естеріңізге сала кетейік, Талғар қаласының бұрынғы әкімі Бақыт Күрішбеков, сондай-ақ оның орынбасары Матан Сағындық 16 жастағы Шерзат Полаттың өлімінен кейін 15 қазанда «қызметтік міндеттерін тиісінше орындамағаны үшін қызметінен алынған болатын.