Қазақстандық Allur автокөлік компаниясы Qazaq Tili Endowment қорына 100 млн теңге аударды. Бұл туралы қордың президенті Рауан Кенжехан хабарлады.
"Бұл – Мемлекет басшысы Қасым-Жомарт Тоқаев бастамасымен үндес, қазақ тілін дамытуға қосылған нақты үлес.”- деп атап өтті Р.Кенжехан.
Қазір Qazaq Tili Endowment қорындағы қаржы 703 669 299 теңгеге жеткен. Осы қаражат есебінен соңғы жылдары 100-ге жуық жоба мен іс-шара жүзеге асырылыпты.
"Allur компаниялар тобы” АҚ негізгі акционері – қазақстандық кәсіпкер Андрей Лаврентьев. Ол “СарыарқаАвтоПром”, “Агромашхолдинг” және “Qarmet” компанияларын да басқарады. Ол өткен жылы елдің ең ауқатты 75 бизнесмендері рейтингісінде 12 орынға жайғасты. Оның капиталы – 840 млн долларға бағаланып отыр.
"Ана тіліміздің болашағына бей-жай қарамай, қолдау көрсеткені үшін Allur компаниясының басшылығы мен ұжымына шынайы алғыс білдіреміз”, – деп жазды Рауан Кенжехан.
