Энергетика министрі Ерлан Ақкенженов өткен жылы өз табысы тек министрлік қызметінен алған жалақымен шектелгенін мәлімдеді, деп хабарлайды Juzmedia.kz.
Ерлан Ақкенженов бұл туралы бүгін Парламенті Мәжілісі кулуарында журналистерге айтып берді. Оның сөзінше, ол мемлекеттік қызметші ретінде декларацияны заң талаптарына сай тапсырған. Министрдің айтуынша, қосымша табыс көздері жоқ.
«Егер қосымша табыс туралы айтсақ, өткен жылы мен үшін жалғыз кіріс көзі – министр ретіндегі жалақым болды. Тиісінше, басқа табысым жоқ», – деді ол.
Ақкенженов ай сайынғы жалақысы шамамен 1,2 миллион теңге деп нақтылады. Сонымен қатар декларацияда заңнамада көзделген сыйақы төлемдері де көрсетілгенін айтты. Ал бір жыл ішінде декларацияда тіркелген жалпы табыс көлемі 20 миллион теңгеден сәл асқан.
Еске салайық, өткен жылдың соңында министрліктер мен Парламенттің ресми сайттарында 2024 жылға арналған шенеуніктердің табыс декларациялары жарияланған болатын.
