Мәжіліс депутаты Үнзила Шапақ Roblox ойынының балалар психикасына әсеріне алаңдап, оны Қазақстанда шектеу мәселесін көтерді, деп хабарлайды Juzmedia.kz.
14 қаңтардағы Мәжілістің пленарлық отырысында депутат ата-аналардан шағымдар жиі түсіп жатқанын айтып, Цифрлық даму, инновациялар және аэроғарыш өнеркәсібі министрі Жаслан Мәдиевтің атына депутаттық сауал жолдады.
«Ата-аналар Roblox ойынының балалардың психикасына кері әсер етіп жатқанын айтып, шағымданып жатыр. Бұл платформада балаларға арналмаған, агрессия мен қауіпті мінез-құлықты қалыптастыратын элементтер бар», – деді Үнзила Шапақ.
Депутаттың айтуынша, ойынның контентін бақылау тетіктері әлсіз, ал жас ерекшелігіне байланысты шектеулер толық сақталмайды.
«Балалардың санасы мен қауіпсіздігі – мемлекеттің тікелей жауапкершілігі. Сондықтан Roblox платформасының Қазақстан аумағындағы қолжетімділігін, контенттік сүзгілерін және жас шектеулерін қайта қарау қажет», – деп түйіндеді мажілісмен.
2025 жылы Roblox платформасына кіретін күнделікті белсенді қолданушылар саны 150 миллионға жуықтаған. Пайдаланушылардың басым бөлігі кәмелетке толмаған балалар мен жасөспірімдер.
