Қазақстанда көліктің мемлекеттік тіркеу нөмірін өз қалауы бойынша таңдау мүмкіндігі енгізілгеннен кейін арнайы халыққа қызмет көрсету орталықтарында кезек артты, деп хабарлайды Juzmedia.kz.
2026 жылғы 1 қаңтардан бастап қазақстандықтар көлік нөмірін цифрлық және әріптік белгілері бойынша еркін таңдай алады. Осы өзгеріске байланысты 5 қаңтар күні еліміздің бірқатар өңіріндегі арнайы ХҚКО-ларда ұзын-сонар кезек пайда болды. Әлеуметтік желілерде жарияланған видеолардан Ақтау мен Алматыдағы орталықтарда қарақұрым халықты байқауға болады.
Аталған жағдайға байланысты «Азаматтарға арналған үкімет» мемлекеттік корпорациясы барлық арнайы ХҚКО-лардың қалыпты режимде жұмыс істеп жатқанын, азаматтарға қызмет көрсету әдеттегі тәртіппен жүргізіліп жатқанын және ақпараттық жүйелерде ешқандай техникалық ақау тіркелмегенін хабарлады.
