Қазанда Қазақстандағы шоколад бағасы тағы 2,3 пайызға өсіп, өнім құнының 78 ай қатарынан шарықтап келе жатқанын көрсетеді. Бір ай бұрын 4,8 пайыздық секіріс тіркелген еді. Бұл соңғы он жылдағы ең жоғары көрсеткіштердің бірі, деп хабарлайды Juzmedia.kz.
Өнім бір жыл ішінде 35,8 пайызға қымбаттады. Бұл шоколадтың жылдық бағасының барлық уақыттағы ең жоғары өсуі. 2024 жылдың қазанында бұл көрсеткіш 18 пайыз болған.
Шоколад нарығындағы ахуал әлемдік какао тапшылығымен тығыз байланысты. АҚШ-та Хэллоуин қарсаңында шоколад жылдық есеппен 30 пайызға қымбаттап, тұтынушылар арзанырақ тәттілерге ауысуда. Көптеген өндіруші какао аз қосылған немесе какаосыз балама өнімдерге көшіп, шығындарын өтеуге тырысып жатыр. Nestlé мен Pladis компаниялары какао үлесінің төмендеуіне байланысты кейбір өнімдерінің қаптамасынан «шоколад» деген сөзді алып тастауға мәжбүр болды. Енді олар «шоколадты», «шоколад дәмі бар» немесе «кондитерлік өнім» сияқты терминдерді қолданады.
FoodNavigator басылымының мәліметінше, какао дағдарысы болашақта шоколадтың қазіргі түсінігін түбегейлі өзгертуі мүмкін. Бұл жағдай сүт өнімдері нарығындағы «сүт» орнына «сүтті» деп жазылатын тауарларды еске салады: құрам өзгергендіктен атауы да өзгеруге мәжбүр.
Осының бәрі шоколадты дәстүрлі мерекелердің, әсіресе Жаңа жылдың ажырамас бөлігі ретінде емес, қымбаттап бара жатқан сәнді өнімге айналдыруы мүмкін. Арзан баламалар немесе какаосыз тәттілер негізгі сегментті басып қалуы ықтимал.
Қазақстанда шоколад және шоколадты кондитерлік өнім өндірісі екі жыл қатарынан төмендеп жатыр. Биылғы қаңтар-қазан айларында шығарылым 72,6 мың тонна болды, бұл былтырғыдан 2,9 пайызға аз. 2024 жылы секторда 14,8 пайыздық күрт құлдырау тіркелген.
Отандық фабрикалар 2025 жылдың тоғыз айында ішкі нарық пен экспорт сұранысының тек 38,9 пайызын қамтамасыз ете алды. Былтыр бұл көрсеткіш 42,8 пайыз болған. Импорт 12,8 пайызға өсіп, 100,5 мың тоннаға жетті.
Жыл басынан бері Қазақстан 66 мың тонна шоколад және какао қосылған дайын өнімдерді импорттап, оған 340,2 млн доллар жұмсады. Бұл көлем былтырғыдан 8,9 пайызға көп, ал қаржылық мәні 37,3 пайызға жоғары. Импортталатын өнімнің тоннасы 4,1 мың доллардан 5,2 мың долларға дейін көтерілді.
Импорттың 70 пайызы Ресейден жеткізілді. Украина (6,1 мың тонна), Түркия (5,1 мың), Германия (2,7 мың) және Қытай (1,2 мың) да негізгі жеткізушілер қатарында. Ең қымбат өнім Украинадан келсе, ең арзаны Қытайдан әкелінді. Қытайдан жеткізілген шоколад көлемі бір жылда 3,6 есе артты.
Қазақстандықтардың шоколад тұтынуы да өсіп жатыр: биыл қаңтар-маусым аралығында жан басына шаққандағы тұтыну 1,9 пайызға өсіп, 477 грамға жетті.
