Украина Президенті Владимир Зеленский Киев делегациясы АҚШ президенті Дональд Трамп ұсынған бейбіт жоспар бойынша келіссөздерді жалғастыру үшін Вашингтонға жол тартқанын айтты. Бұл туралы ол 29 қарашадағы видеоүндеуінде мәлімдеді, деп хабарлайды Juzmedia.kz.
Зеленскийдің айтуынша, делегация жергілікті уақытпен бүгін кешке АҚШ-қа жетуі тиіс. Ол келіссөздер Женевада талқыланған тармақтар негізінде жалғасатынын атап өтті. Президент Америка тарапынан конструктивті ұстаным байқалып отырғанын және алдағы күндері соғысты лайықты аяқтауға бағытталған нақты қадамдарды айқындау мүмкін болатынын айтты.
Мемлекет басшысы украин делегациясының қажетті нұсқаулыққа ие екенін, Киевтің басым бағыттарына сәйкес жұмыс істейтінін жеткізді. Бұған дейін CBS News АҚШ шенеунігіне сілтеме жасап, Киев Вашингтон әзірлеген бейбіт жоспарға келісім бергенін хабарлаған.
Ақ үйдің өкілі Каролин Левитттің айтуынша, Украинадағы қақтығысты реттеу жөніндегі келіссөздерге Мәскеу мен Киев те қатысып отыр. Ол бейбіт келісімге қол жеткізу үшін бірнеше күрделі, бірақ шешуге болатын тармақты пысықтау қажет екенін мәлімдеді. Бұл үшін Украина, Ресей және АҚШ тараптарының қосымша келіссөздері өткізіледі.
Өткен аптада Женевада АҚШ армия министрі Дэн Дрисколл, мемлекеттік хатшы Марко Рубио, Трамптың арнайы өкілі Стив Уиткофф, Джаред Кушнер және Украина мен Еуропа елдерінің дипломаттары кездескен. Келіссөз нәтижесінде бастапқы 28 тармақтан тек 19-ы ғана қалғаны белгілі болды.
Кейін Трамп Air Force One бортында журналистерге берген пікірінде Украина жөніндегі бейбіт жоспар 28 емес, 22 тармақтан тұратынын айтқан.
