Түркия президенті Режеп Тайып Ердоған 24 қарашада Ресей президенті Владимир Путинмен телефон арқылы сөйлесуді жоспарлап отырғанын мәлімдеді деп хабарлайды Juzmedia.kz.
Ол бұл туралы Оңтүстік Африкада өткен G20 саммиті кезінде айтты. Ердоғанның сөзінше, әңгіме негізгі түрде Ресей мен Украина арасындағы соғысқа қатысты болады және екі тарап та қақтығысты тоқтату жолдарын талқылайды.
Оның айтуынша, осы аптада ол Украина президенті Владимир Зеленскиймен Анкарада кездесу өткізді, ал енді келесі күні Путинмен сөйлесуді жоспарлап отыр. Ердоған екіжақты кездесулер барысында соғысқа байланысты жағдайды бағалап, бейбітшілікке қол жеткізу үшін қандай қадам жасауға болатынын талқылағанын жеткізді.
Ресей президентінің баспасөз хатшысы Дмитрий Песков та жоспарланған сөйлесуді растады. Оның айтуынша, байланыс нақты көрсетілген күні өткізілуі тиіс.
Бұған дейін Түркия мен Украина президенттері Анкарада кездесіп, Ердоған Ресей мен Украинаның Стамбулда келіссөздерді қайта бастауы қажет екенін айтқан болатын. Сонымен қатар Швейцарияда Ұлыбритания, Франция, Германия, Украина және АҚШ өкілдері Ресей-Украина қақтығысына қатысты келіссөздер жүргізгені хабарланған.
