Ақ үй Вашингтон әзірлеген бейбіт жоспар жобасын талқылау үшін Женевада өткен АҚШ пен Украина делегацияларының келіссөздері «мазмұнды және пайдалы» өткенін растады. Reuters мәліметінше, тараптар жоспарды жаңартылған нұсқасына дейін жетілдіру үшін жұмыс тобын құрып, алдағы күндері қарқынды келіссөз жалғастыруға келіскен деп хабарлайды Juzmedia.kz.
Бірлескен мәлімдемеде кез келген келісім Украинаның толық егемендігі мен аумақтық тұтастығын қамтамасыз етуі тиіс екені анық айтылды. АҚШ та, Украина да «тұрақты әрі әділ бейбітшілік» тек Киевтің мүддесіне сай келетін жағдайда ғана мүмкін болатынын атап өтті. Reuters дерегінше, Вашингтон бастапқы ұсынысты «соңғы нұсқа емес» деп жариялап, Киевтің түзетулер енгізу құқығын мойындаған.
Кездесуде Украина тарапы АҚШ жоспарының кей тармақтарының қайта пысықталуы қажет екенін айтты. Reuters хабарлауынша, бұл — Еуропа елдерінің де ортақ ұстанымы. Олар құжатты қазіргі күйінде қабылдау қауіпті екенін айтып, өзгерістер енгізуді талап етіп отыр. Ақ үйдің ресми мәлімдемесінде АҚШ, Украина және еуропалық серіктестер бірлесіп жұмыс істейтіні нақты көрсетілген.
Түпкілікті шешімді екі елдің президенттері қабылдайды. Тараптар келісім жобасын жетілдіру жұмыстары дәл осы аптада жалғасатынын мәлімдеді.
