АҚШ президенті Дональд Трамп Ресеймен бизнес жүргізетін кез келген мемлекетке қатаң санкциялар енгізуді көздейтін заң жобасын қолдағанын мәлімдеді деп хабарлайды Juzmedia.kz.
Reuters агенттігінің мәліметінше, Конгрессте қаралып жатқан «Sanctioning Russia Act of 2025» атты заң жобасы Ресеймен сауда немесе энергетикалық әріптестік орнатқан елдерге қосымша шектеулер салуды көздейді. Трамп бұл бастаманы толық қолдап, «Ресеймен бизнес істейтін кез келген ел өте қатал санкцияға ұшырайды» деген мәлімдеме жасады.
Заң жобасы қабылданса, Ресейге қатысты тарифтер мен санкциялар айтарлықтай күшейеді. Оның ішінде Ресейден келетін кез келген тауарға кемінде 500 пайыздық тариф салу, энергетикалық сектордағы инвестицияларды шектеу және онымен жұмыс істейтін шетелдік серіктестерді де санкциялық тізімге енгізу қарастырылған.
Заң жобасының негізгі мақсаты — Ресейдің Украинадағы соғысқа қатысты саясатын қысым арқылы өзгерту. АҚШ-тың республикашыл сенаторлары жобаны дайындап қойғанын хабарлады. Трамп сонымен қатар Ресеймен тығыз жұмыс істейтін Таяу Шығыс пен Азия елдеріне де санкция салынуы мүмкін екенін жасырмады.
Сарапшылар мұндай бастама қабылданса, бұл жаһандық сауда жүйесіне, энергия нарығына және Ресеймен әріптестес мемлекеттердің экономикасына елеулі ықпал етуі мүмкін екенін айтып отыр.
