Бас прокурор қазақстандықтардың атына биометриялық тексерусіз несие рәсімдейтін жаңа алаяқтық тәсілдің анықталғанын мәлімдеді, деп хабарлайды Juzmedia.kz.
Берік Асыловтың айтуынша, Қарағанды облысында II топтағы мүгедек азаматтың жеке деректерін пайдаланып, оның қатысуынсыз 800 мың теңге несие рәсімделген. Азамат несие жайлы тек Halyk Bank қызметкерлері хабарлаған кезде ғана білген.
Тергеу барысында банк қате әрекетке алданғаны анықталып, несие рәсімдеуде азаматтың кінәсі жоқ деп танылды. Осыған байланысты ол зардап шегушілер қатарынан шығарылып, банкке аталған қарызды толықтай есептен шығару жөнінде ұсыныс енгізілді.
Бас прокурордың айтуынша, дәл осындай жағдайлар бойынша 133 азаматтан өндіріп алу шаралары тоқтатылды. Қарыздардың жалпы көлемі 717,1 млн теңгеге жетеді. Бас прокуратура қалған істер бойынша да банктерге қарызды есептен шығару туралы ұсыныстар жолдауды жалғастырып жатыр.
Ведомство дерегінше, соңғы үш жылда кибералаяқтық тұрақты өсіп келеді: 2022 жылы — 20,5 мың, 2023 жылы — 21,7 мың, 2024 жылы — 22,8 мың жағдай тіркелген. Бұл деректер қылмыстың ауқымы кеңейіп жатқанын және азаматтардың жеке деректерін қорғау мәселесі бұрынғыдан да маңызды екенін көрсетеді.
