АҚШ президенті Дональд Трамп Вашингтонда өткен «С5+1» саммитінің қорытындысы бойынша Орталық Азия елдерімен қарым-қатынаста жаңа кезең басталғанын айтты, деп хабарлайды Juzmedia.kz.
«Кеше мен үшін Ақ үйде бес тамаша елдің президенттері — Қасым-Жомарт Тоқаев (Қазақстан), Шавкат Мирзияев (Өзбекстан), Эмомали Рахмон (Тәжікстан), Садыр Жапаров (Қырғыз Республикасы) және Сердар Бердімұхаммедов (Түрікменстан) қатысқан саммит өткізу үлкен мәртебе болды», — деп жазды Трамп Truth Social парақшасында.
Оның айтуынша, соңғы отыз жылда АҚШ басшылары Орталық Азия аймағына жеткілікті назар аудармаған. «Бұл стратегиялық маңызы зор өңір — Еуропа, Азия және Таяу Шығыс тоғысқан жерде орналасқан, табиғи және адами ресурстарға бай. Мен бұл бағытқа толықтай назар аударамын», — деді ол.
Трамп саммит аясында миллиардтаған долларлық келісімдерге қол қойылғанын, олардың авиация, ауыл шаруашылығы, пайдалы қазбалар мен технология салаларында ондаған мың америкалық жұмыс орнын қолдауға мүмкіндік беретінін атап өтті.
«Біздің кездесу АҚШ пен Қазақстан, Өзбекстан, Тәжікстан, Қырғыз Республикасы және Түрікменстан арасындағы тамаша жаңа қатынастардың бастауына айналды», — деп мәлімдеді АҚШ президенті.
